ກອງປະຊຸມສະຫລຸບຜົນຂອງການສຶກສາກ່ຽວກັບລະບົບການອະນຸຍາດ ແລະ ການເຄື່ອນຍ້າຍໄມ້ເຂົ້າສູ່ການຜະລິດ ແລະ ການສົ່ງອອກທີ່ຖືກຕ້ອງໃນ ສປປ ລາວ ໄດ້ຈັດຂຶ້ນໃນວັນທີ 9 ມັງກອນ 2012 ຢູ່ສູນຮ່ວມມືສາກົນລາວ - ຍີ່ປຸ່ນ ໂດຍມີທ່ານ ດຣ. ຕີ ພົມ ມະສັກ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ເປັນປະທານເຂົ້າຮ່ວມກອງປະຊຸມຄັ້ງນີ້ມີຜູ້ຕາງຫນ້າຈາກສະຫະພາບເອີຣົບ (EU), ອົງການຈັດຕັ້ງຂະແຫນງການຕ່າງໆທີ່ກ່ຽວຂ້ອງໃນວຽກງານກະສິກຳ - ປ່າໄມ້ທົ່ວປະເທດ.

　　ກອງປະຊຸມແມ່ນເພື່ອດຳເນີນການສຶກສາລະບົບອະນຸຍາດ ແລະ ການເຄື່ອນໄມ້ເຂົ້າສູ່ການຜະລິດ ແລະ ການສົ່ງອອກທີ່ຖືກຕ້ອງໃນ ສປປ ລາວ ໂດຍການຮ່ວມມືຢ່າງໃກ້ຊິດຈາກລັດຖະບານລາວ ໂດຍສະເພາະແມ່ນຈຸດສູນກາງປະຕິບັດງານ FLEGT ປະຈຳລາວ ທີ່ກົມກວດກາປ່າໄມ້. ການສຶກ

ສານີ້ແມ່ນໄດ້ເລັ່ງໃສ່ການສ້າງຄວາມເຂົ້າໃຈເຖິງສະພາບການຄຸ້ມຄອງ, ການສະຫນອງໄມ້ຈາກປ່າໄມ້ທຳມະຊາດ ແລະ ປ່າປູກຂອງລາວ ເຂົ້າໃນການຜະລິດພາຍໃນ ແລະ ການສົ່ງອອກຖືກຕ້ອງຕາມກົດຫມາຍ ກາຍເປັນຂໍ້ມູນພື້ນຖານທີ່ສຳຄັນເພື່ອສ້າງບັນທັດຖານນິຍາມຄວາມຖືກຕ້ອງຕາມລະບຽບກົດຫມາຍ ເພື່ອຮັບປະກັນໃຫ້ແກ່ການພັດທະນາລະບົບຄວາມຖືກຕ້ອງຕາມກົດຫມາຍຂອງ ສປປ ລາວ ໃນຕໍ່ຫນ້າເພື່ອການອະນຸລັກຮັກສາ ແລະ ນຳໃຊ້ຊັບພະຍາກອນປ່າໄມ້ໃຫ້ຍືນຍົງ ແລະ ເກີດປະໂຫຍດສູງສຸດຕໍ່ຜົນປະໂຫຍດລວມຂອງຊາດ.

　　ກອງປະຊຸມຄັ້ງນີ້ໄດ້ຮັບການສະຫນັບສະຫນູນຈາກສະຖາບັນປ່າໄມ້ສະຫະພາບເອີຣົບ ເພື່ອສະຫນັບສະຫນູນ ສປປ ລາວ ໃນການເຂົ້າຮ່ວມເປັນປະເທດພາຄີຄູ່ຄ້າໄມ້ ແລະ ຜະລິດຕະພັນໄມ້ທີ່ຖືກຕ້ອງຕາມກົດຫມາຍກັບສະຫະພາບເອີຣົບ.