ວັນທີ:
ທີ່ຢູ່ປັດຈຸບັນ:ໜ້າທຳອິດ > ຂ່າວສານ

ແຂວງວຽງຈັນ ຕັ້ງເປົ້າປູກເຂົ້ານາປີ 50.000 ກວ່າເຮັກຕາ ໂດຍຫວັງທົດແທນນາແຊງທີ່ຫລຸດແຜນ

ແຫຼ່ງທີ່ມາ:  ວັນທີ:

  ທ່ານ ເສດໄຊ ວິໄລໄຟ ກຳມະການພັກແຂວງ ເຊິ່ງຫາກໍ່ຍ້າຍມາຮັບຕຳແໜ່ງເປັນຫົວໜ້າພະແນກກະສິກຳ - ປ່າໄມ້ ແຂວງຜູ້ໃໝ່ບໍ່ພໍເທົ່າໃດເດືອນຜ່ານມານີ້ກ່າວວ່າ: ສຳລັບການປູກເຂົ້ານາປີທົ່ວແຂວງໄດ້ວາງເປົ້າໄວ້ທັງໝົດ 52.000-53.000 ເຮັກຕາເທົ່າກັບ 100% ຂອງແຜນການ ເພື່ອຖົມຂຸມຄືນການປູກເຂົ້ານາແຊງທີ່ຫລຸດແຜນ ໂດຍວາງຄາດໝາຍເລີ່ມຕົກກ້າແຕ່ວັນທີ 30 ເດືອນພຶດສະພານີ້ເປັນຕົ້ນໄປ, ແຕ່ກໍ່ຍັງຢູ່ທີ່ຂອດຊົນລະປະທານທີ່ເປ່ເພຍ້ອນພາຍຸ ໄຮມາ ແລະ ນົກເຕັນໃນລະດູຝົນທີ່ຜ່ານມາທັງໝົດ 134 ໂຄງການມີມູນຄ່າການສ້ອມແປງປະມານ 56 ຕື້ກວ່າກີບ, ແຕ່ແນວໃດກໍ່ຕາມນາປີໆນີ້ຕ້ອງໄດ້ຕາມແຜນແນ່ນອນ, ຖ້າບໍ່ດັ່ງນັ້ນກໍ່ຈະກະທົບເຖິງສະຖຽນລະພາບດ້ານສະບຽງອາຫານທີ່ແຂວງໄດ້ວາງເອົາໄວ້ໃນສົກປີ 2011-2012 ຕ້ອງສະໜອງເຂົ້າໃສ່ຫົວຄົນໃຫ້ໄດ້ ໂດຍສະເລ່ຍ 588 ກິໂລຕໍ່ຄົນຕໍ່ປີ ໃນຈຳນວນພົນລະເມືອງປະມານ 470.000 ກວ່າຄົນ. ອີກດ້ານໜຶ່ງຫາກການປູກເຂົ້ານາແຊງປີນີ້ບໍ່ໄດ້ຕາມແຜນກໍ່ຈະສົ່ງຜົນກະທົບຕໍ່ຕົວເລກລຶບລ້າງຄວາມທຸກຍາກທີ່ແຂວງມີໃນປະຈຸບັນເຖິງ 11.400ກວ່າຄອບຄົວໃຫ້ໝົດໄປໃນປີ 2015 ຕ້ອງແກ່ຍາວອອກໄປອີກເພາະເຂົ້າກິນແມ່ນມາດຖານອັນສຳຄັນຂອງການລຶບລ້າງຄວາມທຸກຍາກ ເມື່ອເປັນເຊັ່ນນັ້ນກໍ່ຈະກະທົບໃສ່ແຜນພັດທະນາເສດຖະກິດ-ສັງຄົມຂອງ ແຂວງ 5 ປີ 2011-2015 ທີ່ໄດ້ວາງເອົາໄວ້ເຊັ່ນກັນ.ຂະແໜງຊົນລະປະທານຊີ້ວ່າ: ໃນຈຳນວນຊົນລະປະທານທີ່ຖືກເປ່ເພຍ້ອນພາຍຸໄຮມາ, ນົກເຕັນແລະຄວາມກົດດັນອາກາດຕ່ຳຈຳນວນ 134 ໂຄງການໂດຍມີມູນຄ່າການສ້ອມແປງປະມານ 56 ຕື້ກວ່າກີບນັ້ນ, ຜ່ານມາລັດຖະບານໄດ້ອະນຸມັດເງິນໃຫ້ສ້ອມແປງ ເພື່ອສະໜອງນ້ຳໃສ່ນາແຊງຫວ່າງແລ້ວນີ້ຄື: ຊົນລະປະທານນ້ຳມັງ, ນ້ຳຊ່ວງເຊິ່ງແມ່ນຈຸດສຸມຂອງລັດຖະບານ ແລະ ໂຄງການຍ່ອຍອື່ນອີກ 16 ໂຄງການເປັນເງິນ 8,4 ຕື້ກີບ ເຊິ່ງໂຄງການເຫລົ່ານີ້ແມ່ນນອນຢູ່ໃນແຜນທີ່ສະພາອະນຸມັດ ແລະຮັບຮອງເອົາແລ້ວ.ແຕ່ເພື່ອເຮັດໃຫ້ນາປີໆນີ້ທະລຸເປົ້າຮອດ 52.000-53.000 ເຮັກຕານັ້ນອົງການປົກຄອງແຂວງວຽງຈັນໄດ້ອອກຂໍ້ຕົກລົງໃຫ້ເອກະຊົນເປັນຜູ້ລົງທຶນສ້ອມແປງກ່ອນ 36 ໂຄງການມີມູນຄ່າການສ້ອມແປງປະມານ 24 ຕື້ກວ່າກີບ, ເຖິງວ່າແຂວງຈະຢູ່ໃນພາວະຂອງການຂາດດູນງົບປະມານກໍ່ຕາມແຕ່ຖ້າຫາກເບິ່ງຕົວເລກປະຕິບັດລາຍຮັບໃນ 6 ເດືອນຕົ້ນປີນີ້ກໍ່

ໄດ້ 86 ຕື້ກວ່າກີບ ເຊິ່ງລື່ນແຜນການເລັກໜ້ອຍ, ແຕ່ສຳຄັນກໍ່ຍັງແມ່ນ ບັນຫາເລື່ອງປາກ-ທ້ອງຂອງປະຊາຊົນ ແລະ ຮັບປະກັນສະຖຽນລະພາບດ້ານສະບຽງອາຫານເຮັດໃຫ້ການລຶບລ້າງຄວາມທຸກຍາກຂອງປະຊາຊົນໄປຕາມແຜນທີ່ກຳນົດໄວ້ ຈຶ່ງມີຄວາມຈຳເປັນຕ້ອງໄດ້ປະຕິບັດໄປເຊັ່ນນັ້ນ ແລະ ຄາດວ່າການສ້ອມແປງຈະໃຫ້ສຳເລັດກ່ອນວັນທີ 30 ພຶດສະພາ ເພື່ອສະໜອງນ້ຳໃຫ້ປະຊາຊົນຕົກກ້າແຕ່ເວລານັ້ນເປັນຕົ້ນໄປ, ສ່ວນຍັງອີກ 81 ໂຄງການທີ່ບໍ່ທັນໄດ້ສ້ອມແປງຂະແໜງຊົນລະປະທານ ກໍ່ຈະປຸກລະດົມຂົນຂວາຍປະຊາຊົນນຳໃຊ້ແຮງງານ, ວັດຖຸທີ່ມີໃນທ້ອງຖິ່ນຂອງຕົນສ້ອມແປງແບບແກ້ໄຂໄປກ່ອນເພື່ອລໍຖ້າເອົາເຂົ້າແຜນສ້ອມແປງໃນສົກປີຖັດໄປ.

  

[ຕາຕະລາງເນື້ອໃນທີ່ກ່ຽວຂ້ອງ]

    ລິຂະສິດ:South-East Asia & South Asia Infoport    ເລກທີ 09005773 ຢຸນນານ ICP
    ອຸປະຖຳເຕັກນິກ: ບໍລິສັດຈົງປາຍສິນປັກກິ່ງ