ວັນທີ:
ທີ່ຢູ່ປັດຈຸບັນ:ໜ້າທຳອິດ > ຂ່າວສານ > ໃຫມ່ສຸດ

ເຊັນສັນຍາເພື່ອພັດທະນາເຂດເສດຖະກິດສະເພາະຢູ່ທ່າແຂກ

ແຫຼ່ງທີ່ມາ:  ວັນທີ:

  

  ພິທີເຊັນສັນຍາວ່າດ້ວຍການພັດທະນາເຂດເສດຖະກິດຢູ່ສົ້ນຂົວມິດຕະພາບລາວ - ໄທ ແຫ່ງທີ III, ເມືອງທ່າແຂກແຂວງຄຳມ່ວນເພື່ອສ້າງຕັ້ງເປັນເຂດເສດຖະກິດສະເພາະທ່າແຂກລະຫວ່າງລັດຖະບານແຫ່ງ ສປປ ລາວ ຕາງຫນ້າໂດຍຄະນະກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ກັບສະພາບໍລິຫານເສດຖະກິດເຂດເສດຖະກິດສະເພາະທ່າແຂກໄດ້ຈັດຂຶ້ນຢ່າງເປັນທາງການໃນຕອນແລງຂອງວັນທີ 18 ພຶດສະພາ 2012ທີ່ໂຮງແຮມລ້ານຊ້າງນະຄອນຫລວງວຽງຈັນ. ໃນງານພິທີເຊັນສັນຍາດັ່ງກ່າວໂດຍການໃຫ້ກຽດເຂົ້າຮ່ວມຂອງພະນະທ່ານ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດທັງເປັນປະທານ ຄຂພສ; ທ່ານນາງ ບຸນເພັງມູນໂພໄຊ ກຳມະການສູນກາງພັກ, ລັດຖະມົນຕີປະຈຳຫ້ອງວ່າການລັດຖະບານ, ຮອງປະທານຜູ້ປະຈຳການ ຄຂພສ, ທ່ານ ຄຳໃບ ດຳລັດກຳມະການສູນກາງພັກ, ເຈົ້າແຂວງໆຄຳມ່ວນ ແລະ ບັນດາທ່ານກຳມະການສູນກາງພັກ, ລັດຖະມົນຕີວ່າການ - ຊ່ວຍວ່າການທີ່ເປັນຮອງປະທານ ແລະ ຄະນະກຳມະການ ຄຂພສ ກໍ່ໄດ້ໃຫ້ກຽດເຂົ້າຮ່ວມ. ພິທີເຊັນສັນຍາໃນຄັ້ງນີ້ຕາງຫນ້າໃຫ້ລັດຖະບານກໍ່ຄື ຄຂພສແມ່ນທ່ານ ດຣ. ນາມ ວິຍະເກດ ກຳມະການສູນກາງພັກ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ຮອງປະທານ ຄຂພສ,ເປັນຜູ້ເຊັນລົງນາມໃນສັນຍາ ແລະ ທ່ານ ຄຳໃບ ດຳລັດກຳມະການສູນກາງພັກ, ເຈົ້າແຂວງໆຄຳມ່ວນເຊັນເປັນພະຍານກັບສະພາບໍລິຫານເສດຖະກິດເຂດເສດຖະກິດສະເພາະທ່າແຂກຕາງຫນ້າໂດຍ ທ່ານ ດາວໄຫລ ແກ້ວດວງດີ, ຮອງຫົວຫນ້າພະແນກແຜນການ ແລະ ການລົງທຶນແຂວງຄຳມ່ວນ, ປະທານສະພາບໍລິຫານເສດຖະກິດເຂດ, ເຊັນລົງນາມໃນສັນຍາ ແລະ ເຊັນເປັນພະຍານໂດຍທ່ານນາງ ໂກສີ ພູມສະຫວັນ ປະທານບໍລິສັດເອັສເຄ - ເຄເອັສການຄ້າຂາອອກ-ຂາເຂົ້າ ຈຳກັດ ແລະ ທ່ານພົງສະຫວັນ ໄຊຍະແສງ ຜູ້ອຳນວຍການບໍລິສັດຈະເລີນພັດທະນາກໍ່ສ້າງ ແລະ ສ້ອມແປງເຄຫາສະຖານຈຳກັດ. ພິທີເຊັນສັນຍາວ່າດ້ວຍການພັດທະນາເຂດເສດຖະກິດຢູ່ສົ້ນຂົວມິດຕະພາບລາວ - ໄທ ແຫ່ງທີ III, ເມືອງທ່າແຂກແຂວງຄຳມ່ວນເພື່ອສ້າງຕັ້ງເປັນເຂດເສດຖະກິດສະເພາະທ່າແຂກມີຈຸດປະສົງເພື່ອພັດທະນາໃຫ້ເປັນເຂດເສດຖະກິດທີ່ພຽບພ້ອມໄປດ້ວຍສິ່ງອຳນວຍຄວາມສະດວກຮອງຮັບໃຫ້ແກ່ຜູ້ລົງທຶນ, ນິຕິບຸກຄົນ ແລະ ບຸກຄົນທັງພາຍໃນ ແລະ ຕ່າງປະເທດ, ພັດທະນາໃຫ້ເປັນເມືອງທັນສະໄຫມທີ່ປະກອບດ້ວຍສຳນັກງານ, ອົງການ, ສາທາລະນະສຸກ, ສູນການຄ້າ, ໂຮງແຮມ, ສູນການປະຊຸມ, ທີ່ຢູ່ອາໄສ, ສູນການຂົນສົ່ງສິນຄ້າ ແລະບໍລິການທີ່ຕິດພັນກັບຄວາມສະຫງົບປອດໄພ, ເປັນຕົວເມືອງສີຂຽວ, ມີພື້ນຖານເສດຖະກິດທີ່ເຂັ້ມແຂງ, ວັດທະນະທຳ-ສັງຄົມທີ່ສີວິໄລ ແລະ ຍຸດຕິທຳ, ເສີມສ້າງອະລິຍະທຳ ແລະ ວັດທະນະທຳຂອງຊາດ ແລະ ຮັບປະກັນການພັດທະນາແບບຍືນຍົງ ແລະ ປົກປັກຮັກສາສິ່ງແວດລ້ອມ. ຊຶ່ງກຳນົດຊື່ໂຄງການພັດທະນາແມ່ນ:ເຂດເສດຖະກິດສະເພາະທ່າແຂກ (ຂຽນຫຍໍ້ ຂທຂ) ແລະ ຈະມີທຶນທັງຫມົດເຂົ້າໃນການພັດທະນາໂຄງການບໍ່ຕ່ຳກວ່າ 80 ລ້ານໂດລາ. ສຳລັບເນື້ອທີ່ພັດທະນາ ຂສຂ ແມ່ນກວມເອົາ 1.035 ເຮັກຕາ. ການເຊັນສັນຍາສະບັບນີ້ກໍ່ເພື່ອເປັນການນຳເອົາກົນໄກການຄຸ້ມຄອງ ແລະ ບໍລິຫານ ເຂດຕາມນະໂຍບາຍໃຫມ່ຂອງການພັດທະນາ ຂພສ ທີ່ກຳນົດໄວ້ໃນກົດຫມາຍວ່າດ້ວຍການສົ່ງເສີມການລົງທຶນ ແລະ ດຳລັດວ່າດ້ວຍເຂດເສດຖະກິດພິເສດ ແລະ ເຂດເສດຖະກິດສະເພາະ (ຂທຂ) ໄປຈັດຕັ້ງຜັນຂະຫຍາຍໂດຍຜ່ານ ການຄຸ້ມຄອງບໍລິຫານຕາມກົນໄກກາປະທັບດຽວ, ຫັນເປັນອຸດສາຫະກຳ ແລະ ທັນສະໄຫມດ້ວຍການນຳໃຊ້ລະບົບເອເລັກໂຕຼນິກເຂົ້າໃນການຄຸ້ມຄອງບໍລິຫານທີ່ຮັບປະກັນການໂປ່ງໃສ ແລະ ສາມາດກວດສອບໄດ້ເພື່ອຊຸກຍູ້ ແລະ ອຳນວຍຄວາມສະດວກໃຫ້ແກ່ການດຳເນີນທຸລະກິດ, ການບໍລິການຢູ່ພາຍໃນເຂດກໍ່ຄືການພັດທະນາເຂດໃຫ້ບັນລຸຕາມຈຸດປະສົງເປົ້າຫມາຍທີ່ວາງໄວ້ເພື່ອປະກອບສ່ວນໃຫ້ແກ່ການພັດທະນາເສດຖະກິດຂອງທ້ອງຖິ່ນ ແລະ ຂອງຊາດໃຫ້ຂະຫຍາຍຕົວ.

  

[ຕາຕະລາງເນື້ອໃນທີ່ກ່ຽວຂ້ອງ]

    ລິຂະສິດ:South-East Asia & South Asia Infoport    ເລກທີ 09005773 ຢຸນນານ ICP
    ອຸປະຖຳເຕັກນິກ: ບໍລິສັດຈົງປາຍສິນປັກກິ່ງ